Zajmina Vasjari: Lidhja me Turin më ka ndryshuar jetën
Ndryshe nga gjithë këngëtarët, që periudhën e stinës së verës e shohin si më të artën dhe fitimprurësen, për Zajmina Vasjarin, kjo kohë është kthyer pak në lodhje. Kjo, për arsyen se koncertet i rrëmbejnë asaj kohën që ajo dëshiron t’ia kushtojë të dashurit, Arturit. Megjithatë, ajo ka gjetur një zgjidhje të mesme, të alternojë koncertet me pushimet, pse jo edhe të refuzojë ndonjë koncert dhe për të mos lënë asnjë çast mënjanë të dashurin e saj, i cili është gjithmonë në krah të saj. Këngëtarja simpatike flet ekskluzivisht për Gazetën, duke na rrëfyer për lidhjen e saj, për koncertet verore, klipin e ri që del sot në ekranet shqiptare, apo edhe për projekte të tjera më afatgjata. Madje, ajo tregon edhe disa situata, në të cilat është ndjerë e fyer nga keqpërdorimi i emrit të saj nga disa faqe interneti apo edhe nga shtypi, gazeta.
Lidhja
Arturi është dashuria e Zajminës, me të cilin ajo është lidhur që prej katër muajsh. Një histori kjo që e ka pikënisjen në një kohë tjetër, rreth tre vjet më parë. Dhe qysh në atë kohë ka ekzistuar një tërheqje e madhe mes të dyve. “Ka qenë një dashuri me shikim të parë, qysh atëherë kur jemi parë. Por u desh të kalojë kohë, që të rishiheshim sërish dhe të lidheshim këtu e katër muaj më parë. Që atëherë nuk jemi ndarë asnjë çast nga njëri-tjetri. Jemi mjaft të lumtur së bashku”, - rrëfen Zajmina, ndërsa gëzimi i lexohet në sy. Turi është njeriu që e ka marrosur Zajminën, pasi për të, ai është një mashkull që i ka të gjitha të mirat, që nga fiziku e deri tek shikimi. “Me atë shikim më mori në qafë”, - tregon ajo, ndërsa në karakterin e Turit vlerëson shumë vendosmërinë, natyrën e tij me një karakter vërtetë të fortë. Janë këto cilësi që e kanë bërë për vete Zajminën, e cila nga ana tjetër është e bindur se tek ajo, i dashuri i saj i gjen të gjitha.
Pushimet
Pushimet për të nuk kanë qenë ashtu siç do të dëshironte. Edhe pse java që ka kaluar në Dhërmi me Turin ka qenë e mrekullueshme. Por ka qenë e kufizuar, për shkak të koncerteve të saj. “Këtë vit kam dashur më shumë pushimet sesa koncertet, për t’i qëndruar sa më pranë familjes dhe të dashurit tim”, - shprehet ajo. Por, kjo dëshirë ka qenë disi e kondicionuar. Megjithatë, Zajmina për këtë arsye ka vendosur të refuzojë shumë nga ofertat që i janë bërë, në mënyrë që t’u kushtohet dhe njerëzve të saj të zemrës. Kështu ka vendosur që me të mbaruar sezoni veror, të niset në një udhëtim jashtë Shqipërisë me familjen e saj, në mënyrë që të çlodhet nga kjo verë e gjatë, por edhe të kënaqet pranë tyre.
Koncertet
Qysh me nisjen e sezonit veror, Zajmina ka qenë prezente në shumë koncerte, në Shqipëri e jashtë saj. Ndërsa bisedojmë së bashku, ajo sapo është kthyer nga një koncert në qytetin e Sarandës. “Fillimisht, të gjitha fundjavat i kisha të zëna me koncerte dhe nuk më mbetej asnjë për të pushuar. Por tani kam gjetur një zgjidhje më të mirë për veten, duke shkuar në koncerte gjatë ditëve të javës dhe duke i shijuar fundjavat me të dashurin tim”, - tregon ajo. Në fakt kjo verë, si për shumë këngëtarë, do të mbahet mend më shumë si një sezon koncertesh sesa si një sezon veror. Pasi në të gjitha plazhet, mbrëmjet janë organizuar me koncerte. Një risi kjo që u fut në Shqipëri vetëm disa vite më parë dhe që tashmë është kthyer në një traditë mjaft të mirë, jo vetëm për qytetet bregdetare por edhe për këngëtarët, për të cilët kjo është periudha më fitimprurëse e vitit. Dhe Zajmina në këtë pikë, si shumë të tjerë, duket se është mjaft e kënaqur. Ka qenë prezente në mjaft koncerte, dhe pikërisht sot në mbrëmje do të jetë e ftuar në një koncert në Voskopojë. Ndërkohë që ka qenë prezente thuajse në të gjitha qytetet e vendit, në Sarandë, Vlorë, Shëngjin etj, apo edhe në Kosovë, Maqedoni e Tuz të Malit të Zi, ku pas koncertit të parë është ftuar të jetë sërish e pranishme në një tjetër koncert javës tjetër.
Klipi
Bashkëpunimi i Zajminës me Kastro Zison do të ishte mjaft produktiv për të dy ata. Kënga “Çupa-çupa”, menjëherë u pëlqye nga publiku dhe mori vlerësimet e duhura. E duke parë kërkesat që ka pasur kjo këngë, të dy këngëtarët kanë realizuar edhe klipin e këngës, që sot do të nisë transmetimin e saj në një nga televizionet shqiptare. Mes koncerteve, Zajmina ka gjetur kohë që edhe t’i japë jetë këngës së saj me Kastro Zison, duke e shoqëruar atë me një klip. Klipi i këngës “Çupa-çupa” është realizuar në Maqedoni, nga i preferuari i gjithë këngë-tarëve shqiptarë sot, Princi Aleksandër. “Koha kur kam realizuar klipin ka qenë më e ngjeshura për mua. Pasi, ndërsa gjatë ditës punoja për klipin në Shkup, në mbrëmje kisha çdo ditë koncert në Tetovë dhe ishin ditë vërtet të ngarkuara. Por tani që çdo gjë ka dalë mirë, ndihem mjaft e kënaqur”, - tregon Zajmina.
Projektet
Por edhe pse po kalon një periudhë të ngjeshur me punë, Zajmina ka nisur të mendojë edhe për vjeshtën dhe të bëjë projektet e duhura. Së pari do të jetë pjesëmarrja e saj në Festivalin “Kënga Magjike”, për të cilin, ajo qysh tani ka nisur të mendojë për një këngë që do të tërheqë menjëherë vëmendjen e njerëzve. Dhe më pas do të jetë edhe albumi i Zajminës. “Janë këto dy projekte që unë i kam vërtet për zemër dhe për të cilat kam nisur të punoj qysh tani. Së pari është Festivali “Kënga Magjike”, që do të jetë në vjeshtë dhe së dyti dhe shumë i rëndësishëm, është albumi im. Ende është në proces pune dhe po përpiqem që gjithçka të jetë e përpunuar mirë. Nuk e kam ende një afat kohor për daljen e tij, por mendoj se në muajin dhjetor, ai do të jetë për të gjithë në treg”.
Marre nga gazetashqiptare.com
